---------พุทธภาษิตสอนใจ------------
ลูกสาวอยากได้คำสุษิตสำเนียงอีสาน ยังไม่มีเวลาไปค้นหาให้
เลยนำพุทธภาษิตมาลองแปลให้ดู ชอบใจบอกแม่เอาแบบนี้ยิ่งดี
อิอิ ตามใจ
แปลด้วยกลอนอ่านวชิรปันตีคำอีสาน
----------------------------
***เพิ่นว่า......ยาทิสัง........วปเต..พีชํ
ตาทิสัง........ลภเต ผลัง
..........ปลูกบักมี้................บ่เคยมีเป็นหมากม่วง
..........สวนกว่ากว้าง.........ปลูกผักแล้วผั่นแม่นหวาย ซั้นฤา
..........คือจั่งคนเฮ่นี้.........ทำบาปปาปัง
..........สิไปหวังความดี......แบบได๋สิเห็นฮู้
..........ยูทางเทียวลงส่าง....อเวจีหม่อใหญ่
..........ไฟนรกสุมฮ้อน......รอถ่อนหากสิเห็น แท้แหล่ว
...........ไผผู้ทำบุญส่าง.......กุศลงามยู่ส่ง
...........ทงแต่สุขค่ำเช้า......บ่หอนเศร้าหม่นหมอง
............สุคติคองเจ้า..........สวรรค์พรหมเป็นที่เพิ่ง
..........เถิงเวลาแล้วเจ้า......สรรไว้ก่อกรรม
***อันว่า....สานิ ปาปานิ.........นยันติ ทุคตึ
...........หลิงหัวข้อ ................ความบาลีเพิ่นว่า
..........หนาบาปฮ้าย.............ไปพู้นทุคติ
...........นิริยะนั้น..................นับหนึ่งอเวจี
..........มีเปรตสอง.................ต่อกันเกินฮ้าย
..........อุสุรกายนั้น...............ที่สามเด้อท่าน
..........เดรัจฉานสี่เจ้า............อันนี้ทุคติ
..........ไผสิทำบาปกล้า...........ทางไปโหลดจ่องป่อง
..........คองบ่ดนดอกเจ้า........ไปแท้แน่นอน
***..........สุกรํ.........สาธุนา สาธุ
................สาธุ......... ปาเปน ทุกรํ
..........ครั้งก่อนกี้.................ปู่ย่าและตายาย
..........หลายควมสอน........ เฮ็ดดีง่ายกะด้อ
..........พ่อแต่เว้า...................เขาย้องให้เฮ็ดไว
..........กรรมบาปฮ้าย.............คนทั้งหลายห้ามอย่า
..........ว่าสิทำบาปนั้น..............คนห้ามเฮ็ดยากหลาย
***...........ตญฺจ กมฺมํ............. กตํ สาธุ
...........ยํ กตฺวา .....................นานุตปฺปติ
..........กรรมหยังแหล่ว.........ทำไปสะบายอยู่
..........สุขซู่มื้อ.....................บ่มีฮ้อนขุ่นหมอง
..........ทำนองนี้.....................กรรมดีเพิ่นเว้าว่า
..........พากันสาวสืบไว้..........ดีแล้วสั่งกุศล
****น ตํ กมฺมํ กตํ สาธุ ......... ยํ กตฺวา อนุตปฺปติ
..........กรรมได๋สร้าง..............ปางหลังผัดฮ้อนเฮ่ง
.........เล็งเบิ่งนั้น...................บาปฮ้ายอย่ากระทำ
.........กรรมศีลห้า..................ขาดข้อได๋บาปจ่อง
.........เฮาพี่น้อง......................อย่างวางถิ่มปล่อยศีล
.........ตีนบ่จุ่มน้ำ...................อเวจีบาปบ่ส่ง
.........ตรงเฮาเว้น...................เวรข่องได้เพราะศีล
***นิสมฺม กรณํ........(ตํ) เสยฺโย... ดีหลายคนย้อง
........ฮิ่นตรองแล้ว...........ลงมือเวียกกะล่วง
.........บ่มีขวงขัดข้อง.......งานแล้วเวียกสบาย
.........หลายคนฟ้าว..........ลงมือบ่ไปฮ่ำ
........กรรมหลากพ้อ........ขัดข้องยากเข็ญ
........เป็นแนวนี้................สติมาตั้งต่อ
........พ่อแม่เค้า.................สอนไว้จื่อจำ ซั้นแหล่ว
****รกฺเขยฺย อตฺตโน สาธุํ ......... ลวณํ โลณตํ ยถา
..........อัว่า ...ความดีนี้..............รักษาเด้ออย่าถิ่มปล่อย
..........ค่อยสะสมทุกมื้อ..........สิคือน้ำบ่อทราย
.........หลายวันแล้ว...............เกลือยังเค็มอยู่เก่า
..........เอาถิ่มไว้ล่างพุ้น.........กะเค็มปี้ดั่งเดิม
.........เสริมคนให้.................ควมดีรักษ์ไว้แหน่....
.........เหิงแก่เฒ่า...................ดีเจ้าดั่งเดิมเด้อพ่อใหกญ่
******โย ปุพฺเพ กตกลฺยาโณ กตตฺโถ นาวพุชฺฌติ
อตฺถา ตสฺส ปลุชฺชนฺติ เย โหนฺติ อภิปตฺถิตา.
.......เขามีคุณอวยให้...................บ่สนใจแยงเบิ่ง
.......เหิ่งเสื่อมได้.........................ผลสร่างบ่เจริญ แท้แหล่ว
.......ปาชญ์บ่สรรเสริญเจ้า...........กตัญญุบ่ฮู้เมื่อ
.......เหลือขยันปานนั้น...............อย่าหวังถ่อนห่อนเจริญ
******สเจ ปุพฺเพกตเหตุ สุขทุกขํ นิคจฺฉติ
........โปราณกํ กตํ ปาปํ ตเมโส มุญฺจเต อิณํ.
.......อันว่าควมทุกข์ไฮ้.......มันมาบ่บอกกล่าว
........คราวก่อนกี้..............กรรมส่างบาปกรรม
........ผลนำให้.................ทุกข์ทนเช้าค่ำ
........กรรมมันหนียากแท้.....ทนสู้อย่างเดียว
........เทียวชดใช้..............หมดกรรมหายใจออก
.......บุญบอกข้าง.............ปางนี้อยู่เกษม แท้แหล่ว
******สุขกามานิ ภูตานิ โย ทณฺเฑน วิหึสติ
.......อตฺตโน สุขเมสาโน เปจฺจ โส น ลภเต สุขํ.
เพิ่นว่า สรรพสัตว์นี้........ประสงค์สุขทุกเช้าคำ
คือกัน..เหมิดทุกก้ำ........อย่าบังเบียดแก่กัน
........ครั้นอยากได้........สบายอย่าเบียนเขา
........บาปนำเฮา...........ภายหลังบ่สุขได้
******สุขกามานิ ภูตานิ โย ทณฺเฑน น หึสติ
.......อตฺตโน สุขเมสาโน เปจฺจ โส ลภเต สุขํ.
ครั้นเจ้า..หวังสุขแล้ว........บ่เบียนเบียดผู้ได๋
.......ใจเจ้าเป็นกุศล........ผลคือสุขภายหน้า
.......ลาภพนี้.................หนีไปภพอื่น
เทพกะ ชมชื่นหน้า..........พรหมย่องส่งเสริม แท้แหล่ว
จริญญา แสงทองโพส : 6/12/2558
------------------------
จริญญา แสงทองโพส : 6/12/2558
------------------------
ไม่มีความคิดเห็น:
แสดงความคิดเห็น